Цётка: "Мае думкі". Аўдыякніга. Беларуская літаратура ("Літаратура "Беларуская"). 10 клас. Літаратура - YouTube. Цётка: "Мои мысли". Аудиокнига. Белорусская литература. 10 класс. Цётка Мае думкі Хацела б быць зярном пшаніцы, Упасць на ніўкі вёскі, Зазалаціцца, без мятліцы Даць хлеб смачнейшы трошкі. Хацела б быць я рэчкай быстрай, Абегчы родны край! Дзе напаіць, а дзе скупаць, А дзе ўтуліцца ў гай, То зашумець, то зашаптаць, То спаць ў салодкім сне, То зноў сарвацца, зноў гуляць, Агнём кіпець у дне. Ды так разгрэцца і спяніцца, Каб у неба хваляй здаць, Ўкрасці сонца, зноў спусціцца І больш света людзям даць. Прыгарнуць усё ў дарозе, Каплю шчасця, долі ўліць, Думаць ўсюды аб народзе, Родны край усюды сніць. То рассыпацца расою Па галінках, па лісткох, То абняцца так з зямлёю, Каб ніхто разняць не мог. Альбо ветрам абярнуся Ды над светам пралячу, Цёмным віхрам закручуся, Ўверх на месяц заскачу. З усёй сілы і размаху, Як крэсівам, ў звёзды дам, Сыпне іскраў сноп ад страху, Задрыжыць аж месяц сам: “Хто ты, скуль ты, чаго хочаш, Чаго выеш і шуміш? То праз слёзы нам рагочаш, То гарыш весь і дрыжыш?” - Я – пасланец, вецер буйны, Прыляцеў на суд вас зваць! У нас цёмна, край наш хмурны, Ад цямноты людзі спяць. Я там біўся, я там віўся, Я ім хаты паламаў, А ўсё ж такі не дабіўся, Каб народ свой голас даў!.. 1905? ________________________________________ Тэкст падаецца паводле выдання: Беларуская літаратура : хрэстаматыя / [складальнікі: У. В. Адамчык, М. В. Адамчык]. - Мінск : Сучасны літаратар, 2004. - 1007 с. Крыніца: скан