https://valerydaynekocom.wordpress.com/2018/04/14/2000/
Калі раніцай вёдрамі ляскала
І да рэчкі спяшала босая, —
Я цябе цалаваў краскамі,
Я цябе цалаваў росамі.
Калі ў поўдзень ішла палеткамі,
Маладога спакою поўная, —
Я цябе цалаваў кветкамі,
Я цябе цалаваў промнямі.
Калі ўвечар да весніц выйшла
І стаяла пад вішнямі колкімі, —
Я цябе цалаваў цішаю,
Я цябе цалаваў зоркамі.
Што, як ноччу ў акно пагрукаю,
Недасяжная і спакусная?..
Я цябе цалаваў думкамі,
А хачу цалаваць вуснамі.