Мову Паднябеснай у якасці замежнай з кожным годам выбіраюць усё больш вучняў. Толькі ў сталіцы ўсходняе пісьмо вывучаюць у пяці гімназіях і школах як асноўны прадмет, так і ў якасці факультатыву. Яшчэ шэсць гімназій прапануюць вывучэнне іерогліфаў у аб'яднаннях па інтарэсах. Сталічныя вучні - актыўныя ўдзельнікі міжнародных конкурсаў і алімпіяд. Дарэчы, удасканальваць свае веды і больш глыбока знаёміцца з культурай Паднябеснай дапамагаюць валанцёры з Кітая. Адной з апошніх "кітайскую хвалю" ў сталіцы падхапіла гімназія № 40. Там кітайскую мову вывучаюць толькі другі год. Нягледзячы на гэта, на першым Рэспубліканскім дзіцячым фестывалі "Кітайская зорка" вучні сталі пераможцамі ў намінацыі "Лепшае вымаўленне". А ўжо заўтра сталічныя настаўнікі і вучні, якія вывучаюць мову Паднябеснай, далучацца да святкавання кітайскага Новага года ці, па-іншаму, свята вясны.