Выстава іканапісу ў мінскай галерэі "Універсітэт культуры", у галерэі Савіцкага – своеасаблівы погляд на Парыж, а музычная капэла "Санорус" рыхтуе прэм'еру паводле твораў Вівальдзі. Плануем выхадныя з Ларысай Гулякевіч і рубрыкай "Праменад". Выстава іканапісу ў мастацкай галерэі "Універсітэт культуры" аб'ядноўвае сучаснае мастацтва ўсходняй і заходняй культур. Выстава пад назвай “Абожанае цела” створана па выніках 9-га Міжнароднага пленэра па іканапісе ў польскай Навіцы. Леташнія вераснёвыя майстар-класы сабралі больш за 40 мастакоў з Польшчы, Украіны, Беларусі, а таксама ўпершыню ўдзельнічаў мастак з Румыніі. Парыж – гэтаму рамантычнаму гораду прысвечана 40 работ фатографа Леа Ціма, выхадца з Беларусі. Нават ёсць звесткі , што яго сапраўднае імя Леанід Цімафееў. Фотавыстава, што адкрылася ў мастацкай галерэі Савіцкага, так і называецца «Погляд». Парыж без турыстычнага ажыятажу, праменад па вуліцах і славутасці - у аб'ектыве французскага мастака, выхадца з Беларусі, які жыве ў Мюнхене. Тое, што мастак Леа Цім не паспявае намаляваць пэндзлем, ён ахоплівае аб'ектывам фотаапарата, куды трапляюць гарадскія пейзажы, архітэктура, прырода, імгненні жыцця з яго персанажамі. Пад музыку Вівальдзі... Самаму вядомаму італьянскаму кампазітару Антоніа Вівальдзі сёлета 340. З гэтай нагоды ў суботу канцэрт у Верхнім горадзе дае музычная капэла "Санорус". Рубрыка "Праменад" завітала на рэпетыцыю. У кампазітарскай скарбонцы Антоніа Вівальдзі больш за 400 скрыпічных канцэртаў, духоўных стварэнняў, опер. Яго творы гучалі ў цэрквах, на свецкіх прыёмах і ў каралеўскіх палацах. Музыцы барока як сувязнаму звяну паміж культурнай спадчынай мінулага і сучаснасці належыць асаблівая роля. У выкананні заслужанага калектыву Беларусі «Музычная капэла «Санорус» прагучаць два канцэрты для скрыпкі сола і аркестра, аркестравыя канцэрты, а таксама дзве харавыя кантаты. «Жыццё цудоўнае» - персанальная выстава мастака Славы Наваслаўскага адкрылася ў Музеі гісторыі беларускага кіно. Нясумных выхадных і да наступнай пятніцы.