Дакрануцца да космасу можна не пакідаючы Мінска. Убачыць уласныя рэчы касманаўтаў Пятра Клімука, Уладзіміра Кавалёнка і Алега Навіцкага - лётныя касцюмы, скафандр, флаг краіны, які знаходзіўся на Міжнароднай касмічнай станцыі, архіўныя здымкі і кадры Зямлі са спадарожніка. Сёння ў Беларусі адзначаюць Дзень касманаўтыкі. Да свята ў Музеі сучаснай дзяржаўнасці адкрылася выстава пад назвай "Чалавек. Космас. Беларусь". Экспазіцыя дэманструе ўсю гісторыю развіцця айчыннай касманаўтыкі. Можна пазнаёміцца з працамі выдатных навукоўцаў і даследчыкаў. Дапоўнена экспазіцыя скульптурамі народнага мастака Івана Міско. Ён знаёмы і сябруе з многімі вядомымі касманаўтамі. Тэма космасу дамінуе ў яго творчасці. Зараз майстар працуе над чарговым праектам - 6-метровым памятным знакам Пятру Клімуку, Уладзіміру Кавалёнку і Алегу Навіцкаму. Ён будзе ўсталяваны на сталічнай вуліцы Касманаўтаў да Міжнароднага касмічнага кангрэсу, які адбудзецца ў Мінску ў верасні.