У птушак працягваецца сезон міграцыі. У вырай адляцелі ластаўкі, стрыжы і салаўі. А вось паназіраць за падарожжам беларускіх падорлікаў можна анлайн з дапамогай інтэрактыўный карты. Між тым, лебедзі, наадварот, не спяшаюцца ў цёплыя мясціны з-за даволі камфортнага надвор'я. Нярэдка яны ўвогуле застаюцца зімаваць на беларускіх вадаёмах. Аляксандра Кавеліч раскажа, як рыхтуюцца да зімоўкі сталічныя птушкі. Маленькая сава, быццам зачараваная, разглядае новую абстаноўку. Хворую птушку знайшлі некалькі дзён таму ў адным са сталічных паркаў. Паводле слоў арнітолагаў, махнаногі сыч - даволі рэдкі госць у сталіцы. Хутчэй за ўсё, прыляцеў у горад у пошуках ежы. Зараз набіраецца сіл і рыхтуецца да наваселля. Зараз у птушак сезон міграцыі. Праўда, адлятаюць у вырай не ўсе. Застаюцца на зіму совы, дразды і берасцянкі. А сярод тых, хто ўжо адправіўся ў вялікае падарожжа, - салаўі, стрыжы, а таксама падорлікі. Дарэчы, убачыць іх маршрут можна з дапамогай анлайн-карты. Так, крылаты па мянушцы Ціхан зараз адпачывае ў Судане, а Блонд абраў для зімовых канікул грэчаскае ўзбярэжжа. Пры гэтым птушкі са Скандынавіі - чачоткі і амялушкі - нярэдка выбіраюць у якасці курорта беларускія лясы. А многія мясцовыя жыхары з-за даволі цёплых зім, наадварот, адмяняюць загранічны адпачынак. Сярод іх - пліскі і некаторыя вадаплаўныя. Звычайна лебедзі і качкі адпраўляюцца ў вырай яшчэ ў пачатку восені, аднак штогод больш за тысячу птушак застаюцца ў Беларусі. Так зрабілі і жыхары гэтага вадаёма. Яны не баяцца холаду і да наступлення моцнага марозу без перашкод знаходзяць ежу. Таму падкормліваць крылатых восенню, паводле слоў арнітолагаў, нельга. Перасяленне птушак прадоўжыцца да зімы. Тады спецыялісты разам з аматарамі-бёрдвотчарамі правядуць сезонны падлік, каб прасачыць, колькі крылатых вырашылі змяніць свой маршрут і засталіся дома.