Якія законы ў Канстытуцыі не будуць абавязваць хрысціянаў?  У шостым стагоддзі да Нараджэння Хрыста, пасля сямідзесяці гадоў прабывання ў Вавілонскай няволі, народ абраны Богам вяртаецца ў Палестыну ды пачынае адбудоўваць сваю краіну. Бог бласлаўляе народу, але і народ у аснову грамадскага жыцця кладзе Божы Закон. "Чыталі кнігу Закону Божага … тлумачылі, і раскрывалі сэнс" (Нэм 8,8) - гаворыць Нэмія  адзін з кіраўнікоў народу і аўтар біблейскай кнігі са Старога Запавету. Прычынай разбурэння краіны і, ў выніку, рабства быў адыход народа ад Закону. Пачаткам аднаўлення краіны становіцца вяртанне народа да Закону.  Універсальная мудрасць Божага слова, якая пасуе для ўсіх народаў і актуальная ва ўсе часы, ёсць у тым, што каб народ мог будаваць жыццё сваёй мары, трэба пачаць выконваць Закон. Законы ж чалавек не сам сабе мае выдумляць, але адчытаць іх у Законе Бога, Стварыцеля сусвету і даўцы ўсякіх законаў. У  Ісаі чытаем " Я стварыў зямлю і чалавека… Я усяму даў закон" ( Іс 43,12) Гэта добра, калі ў грамадстве агучваюцца законы па якіх мае жыць народ, ды прапісваюцца яны ў выглядзе дакументаў. Мы, беларусы, можам ганарыцца прапісаным законам нашых продкаў ужо ў ХVI ст. у выглядзе статутаў ВКЛ.  Пасля быў Закон прапісаны ў выглядзе Канстытуцыі 3 мая 1791 г. Кепска, калі ствараючы канстытуцыі або трансфарміруючы іх, законы пішуцца пад кагосьці аднаго з мэтай надаць выключныя правы для нейкіх канкрэтных асобаў ды, пры гэтым, забываюцца пра Закон Божы і раўнапраўе ўсіх людзей. Паўстанне такіх законаў па сваёй сутнасці немагчыма назваць справядлівымі і правамоцнымі. Як павучае Касцёл афіцыйна "Улада павінна ствараць справядлівыя, г.зн. адпаведныя чалавечай годнасці і патрабавання здаровага розуму законы" (#Кампендый Сацыяльнага Вучэння Касцёла КСВК 398). А далей Касцёл цытуе святога Фаму Аквінскага, тлумачыць: "Чалавечы закон тады можа лічыцца законам, калі ён адпавядае здароваму розуму, а значыуь паходзіць ад вечнага закону. Калі ж закон супярэчыць розуму, то ён лічыцца несправядлівым. У такім выпадку ён перастае быць законам, і ператвараецца хутчэй у акт насілля".  Наступнай жа думкай агучваецца права верніка на пратэст сумлення перад несправядлівым законам.  (КСВК 399) Цытуюцца словы з #Катэхізіс Касцёла Каталіцкага (ККК п.2242) "грамадзянін не абавязаны ў сумленні захоўваць прадпісанні дзяржаўнай улады..." - на ўвазе маюцца несправядлівыя законы.  Госпад і Касцёл дае права не выконваць у сумленні такія законы і не важна кім і як яны прапісваюцца. Кожны новы несправядлівы закон у грамадстве вядзе да канфрантацыі, а ў глабальнай перспектыве да зруйнавання той улады і дзяржавы, якія гэты законы прымаюць. У сваю чаргу, Хрыстос прапануе усім нам углядацца ў Яго. Ён прыйшоў у свет каб выканаць Закон. ( пар. Мц 5,17) Выкананню Закону Божага ў гэтым свеце спадарожнічаюць такія знакі як "добрая навіна абвяшчаецца ўбогім", "палонным - вызваленне", "сляпым вяртаецца зрок", "спакутаваныя выходзяць на свабоду". (пар. Лк 1, 14-21) Няхай Госпад усёй Беларусі верне зрок, каб мы ўбачылі, што жыць па-закону і быць верным Закону Божаму значна лепш, чым жыць не па-законах. Няхай спакутаваныя атрымаюць свабоду.  @belsat_news