Дубровушка ды зялёная
Серыя "Беларуская народная творчасць"
Восеньскія і талочныя песні. Нумар 174
Зап. М.Гарэцкі і А. Ягораў у 1926 годзе ў вёсцы Малая Багацькаўка Мсціслаўскага раёна
"Як зап'юць дачку і ўвосень"
Беларускія народныя песні збіраюць ужо больш за сто гадоў. Апублікаваны таўсценныя тамы і сур'ёзныя навуковыя працы. Але, на жаль, там яны і застаюцца. Надышоў час спяваць.
Дубровушка ды зялёная
Ўсю восень шумела,
Ох, лёлюшкі ды палёлюшкі,
Ўсю восень шумела.
Усю восень шумела,
З лістам гаманіла,
Ох, лёлюшкі ды палёлюшкі,
З лістам гаварыла:
- Лісточак мой ты зялёненькі,
Будзець нам разлука!
Ох, лёлюшкі ды палёлюшкі,
Будзець нам разлука.
Разлучаць жа нас з табою
Снягі ды марозы,
Ох, лёлюшкі ды палёлюшкі,
Снягі ды марозы.
Астануся я без цябе
Веццямі шугаці,
Ох, лёлюшкі ды палёлюшкі,
Веццямі шугаці.
А ты зляціш, а ты падзеш
Зямлю пакрываці,
Ох, лёлюшкі ды палёлюшкі,
Зямлю пакрываці.
Дачка дый з маткаю
Ўсю ночку не спалі,
Ох, лёлюшкі ды палёлюшкі,
Ўсю ноч гаварылі:
- Ах, мамачка ты радзімая,
Будзець нам разлука!
Ох, лёлюшкі ды палёлюшкі,
Будзець нам разлука.
Разлучаць жа нас з табою
Князі ды баяры,
Ох, лёлюшкі ды палёлюшкі,
Князі ды баяры.
Чакайце новыя песні тры разы на тыдзень - панядзелак, серада і пятніца.
Яшчэ больш песен у телеграм канале: https://t.me/spiavaizasynai