Серыя "Беларуская народная творчасць"
Балады. Том 1. Нумар 18
Зап. А.І. Гурскі ў 1971 годзе ў вёсцы Лабуцёўцы Браслаўскага раёна Віцебскай вобласці ад Любові Мандрык 1905 г.н.
"Спявалі на хрэсьбінах"
Чаму таму дзераўку Бог лісточак даў,
А мне маладзенькай, Бог долі не даў?
Аддаў мяне татулька замуж далёка,
Прыказала маманька ў госці не ехаць.
Жыву я гадочак, жыву я другі,
На трэцім гадочку зажурылася.
На трэцім гадочку зажурылася,
Да татулькі ў госцікі захацелася.
Запрагу я коніка, конік не вязець,
Ды пайду, пайду я ў чыста поле,
Ды найду, найду я цяцер'е пер'е,
Цяцер'е пер'е, саколля крылля.
Цяцер'е пер'е, саколля крылля,
Ды паляту, паляту прама ў шчыры бор.
Ды паляту, паляту прама ў шчыры бор,
Ды закукую ж я громка, жаласна.
Ці не ўчуець браценька, каня пасучы,
Ці не ўчуець сястрыца, ваду несучы?
- Калі шэра зязюля, ляці ў шчыры бор,
Калі наша сястрыца, ляці ў наш двор.
Чакайце новыя песні тры разы на тыдзень - панядзелак, серада і пятніца.
Яшчэ больш песен у телеграм канале: https://t.me/spiavaizasynai