Кудзеля мая, няволя мая Серыя "Беларуская народная творчасць" Балады. Том 1. Нумар 366 Зап. Г.А. Барташэвіч у вёсцы Выжары Кіраўскага раёна Магілёўскай вобласці ад Антолі Фіневіч 1909 года нараджэння. "Спяваюць у пост, як прадуць бабы кудзелю" Кудзеля мая, няволя мая, Я цябе праду й не напрадуся. Я цябе праду й не напрадуся, На цябе гляджу, не нагляджуся. На цябе гляджу, не нагляджуся, Кіну кудзелю я й на паліцу. Кіну кудзелю я й на паліцу, Да сама пайду я на вуліцу. А на вуліцы скрыпкі да дудкі, Да там гулялі дзеўкі-галубкі. Да ў тое ўрэмя маць сына радзіла, І спарадзіўшы, узгадавала. І ўзгадаваўшы, у войска паслала. Жджэ маці гадок, жджэ маці другі. На трэці гадок едзе мой сынок, Едзе мой сынок, а з нявехнаю. Маць сына стракае з зялёным віном, Ой, нявехначку - ўсё з атрутачкай. Сын віна не п'е, пад коніка лье, Да й атрутачку - папалам чарачку. - Не ўмела, маці, нас пасылаці, Да сумей, маці, нас пахаваці. Сына схавала ўсё й пад цэркаўкай, А нявехначку - ўсё й за цэркаўкай. Сына накрыла зялёным сукном, А нявехначку - белым палатном. На сыну вырас зялёны явар, На нявехначцы - бела бяроза. Раслі, раслі, пахіліліся, Цераз цэркаўку сашчапіліся. Ішла маці Богу маліцца, Богу маліцца, дзіву дзівіцца. Што на сыну вырас зялёны явар, А на нявехначцы - бела бяроза. - Недзе мае дзеткі верна любіліся, Што цераз цэркаўку сашчапіліся. Чакайце новыя песні тры разы на тыдзень - панядзелак, серада і пятніца. Яшчэ больш песен у телеграм канале: https://t.me/spiavaizasynai