Серыя "Беларуская народная творчасць"
Балады. Том І. Нумар 79
Зап. Н.М. Маркава ў 1974 годзе ў вёсцы Косетаў Калінкавіцкага раёна Гомельскай вобласці ад М.Ф. Штурмы 1911 г.н.
Цячэ рэчанька, цячэ быстрая,
А я пераскочу.
Аддай мяне, маць, аддай, родная,
За каго я хочу.
Ідзі, ідзі, доч, ідзі, родная,
Госцем не бывайся.
Ой, як будзе там табе горушка,
Дамоў не вяртайся.
Жыла яна год, жыла яна два,
Трэці не сцярпела.
Скінулась яна шэрай зязюляй,
К роду паляцела.
Полем ляцела - землю скрапляла
Дробнымі слязамі.
Лесам ляцела - голле ламала
Чорнымі крыламі.
Прыляцела ў сад к сваёй мамачцы,
Села на каліне.
Ой, яна пяе, ды й прыказвае:
- Гора на чужыне.
Яе родна маць сядзіць у вакна,
Рушнік ушывае.
Яе родны брат, стаіць у вакна,
Ружжо заражае.
- Пазволь, пазволь, маць, зязюлю страляць,
Што ў нас на каліне.
Ой яна пяе, ды й прыказуе:
- Гора на чужыне.
- Не пазволю, сын, зязюлю страляць,
Што ў нас на каліне.
Недзе наша доч так прыказуе:
- Гора на чужыне.
Чакайце новыя песні тры разы на тыдзень - панядзелак, серада і пятніца.
Яшчэ больш песен у телеграм канале: https://t.me/spiavaizasynai