Серыя "Беларуская народная творчасць" Балады. Том І. Нумар 14 Зап. П.П. Альхімовіч у 1973 годзе ў вёсцы Абідавічы Быхаўскага раёна Магілёўскай вобласці ад Дуні Мяньковай 1907 г.н. і Таццяны Кісялёвай 1912 г.н. "Абы-калі" Аддала мяне мамачка замуж далёка, Не была я ў мамачкі чатыры гады. Як скінусь, як скінусь я шэрай зязюляй, Як палячу, як палячу к мамачцы ў госці. Ажно мая мамачка па двары ходзя, Йна й нявестушак, йна й ластушак пабуджавае. - Устаньце вы й, нявестачкі, й мае ластушкі, Што ў нашым садзе за птушка пяе? Калі шэра зязюлечка - ляці ў шчыры бор, Калі мая дачушачка - хадзі ка мне ў двор. А дачушка не дагадалась матчыных размоў, Як скінулась ды паляцела зноў у шчыры бор. Чыраз бары ляцела - бары сушыла, Чыраз лугі ляцела - лугі тапіла. Бары яна сушыла сваёю красой, Лугі яна тапіла горкаю слязой. Чакайце новыя песні тры разы на тыдзень - панядзелак, серада і пятніца. Яшчэ больш песен у телеграм канале: https://t.me/spiavaizasynai