Серыя "Беларуская народная творчасць" Балады. Том 1. Нумар 445 Зап. Н.М. Маркава ў 1974 годзе ў вёсцы Бярэжцы Жыткавіцкага раёна Гомельскай вобласці ад Н.Д. Вянгуры 1917 г.н. "Балада" Ой ты, Галю, Галю, Галю маладая, Да й была ў Галі свякроўка ліхая. Ды паслала Галю у бор жыта жаці. - Ужні, Галя, жыта ды й не разгінайся. Ужні, Галя, жыта ды й не разгінайся, На яснае сонца ды й не прыглядайся. Разагнулась Галя, ах, ужо не рана, Ды й пабегла Галя бежачкам дадому. Ды пабегла Галя бежачкам дадому, Падаіла Галя чатыры каровы. А пад пяту Галя стала прысядаці, А то тож ідзе жа, йдзе Галіна маці. Ой ты, Галю, Галю, Галя маладая, - Ой дзе ж твая, Галя, дзяціна малая? Ды пабегла Галя бежачкам дарожкай, Сустрачае Галя сівага ж воўца. Сівага ж воўца, краснага малойца. - Ой ты, сівы воўча, ты красны малойча. Ой ты, сівы воўча, ты красны малойча, Ой, ці не відаў ты малое дзяціны? - Ой, тваю дзяціну тры нянькі калышуць: Што першая нянька - зялёны дубочак. Што першая нянька - зялёны дубочак, А другая нянька - сівы галубочак. А другая нянька - сівы галубочак, А трэцяя нянька - святая нядзелька. Зялёны дубочак моцненька віхае, Сівы галубочак вочачкі ўбірае. Сівы галубочак вочачкі ўбірае, Святая нядзелька костачкі ўрывае. Чакайце новыя песні тры разы на тыдзень - панядзелак, серада і пятніца. Яшчэ больш песен у телеграм канале: https://t.me/spiavaizasynai