Серыя "Беларуская народная творчасць" Балады. Том І. Нумар 122. Зап. П.П. Альхімовіч у 1973 годзе ў вёсцы Жасцінае Лагойскага раёна Мінскай вобласці ад Евы Гарохавік і Евы Кабяк "Абы-калі" Крапіўка мая жучлівая, Крапіўка мая жучлівая, Свякроўка мая журлівая, Свякроўка мая журлівая. Журыла мяне як дзень, так ноч: - Ідзі, нявехна, ад дому проч. Ідзі, нявехна, ў чыста поле, Ой, стань, нявехна, пры дарозе, Ой, стань, нявехна, пры шырокай. Як будзе мой сын з вайны ехаць. Будзе з калінкі дзівіціся, Як прыдзе дамоў - хваліціся. - Ой, праехаў Русь, Украіну, Ой, не стрэў такую каліну. Без дожджу яна высокая, Без сонца яна чырвоная. Без ветру яна схілілася, Мне, маладому, скланілася. - Ой, вазьмі, сынку, ты вострую меч, Ой, ідзі, сынку, каліну сеч. Ой, узяў жа ён ды войструю меч, Ой, пайшоў жа ён калінку сеч. Секануў ён раз - кроў свіснула, Секануў другі - прамовіла: - Не каліну сячэш - жану сваю. - Ой, жана мая найвярнейшая, Ой, дружка мая наймілейшая, Хто ж табе сказаў тут стаяці? - Ой, сказала мне твая маці, Ой, сказала мне твая родная. Ой, узяў жа ён ды вострую меч, Ой, зняў жа матцы галовачку з плеч. - От табе, мамка, радасць мая, От табе, мамка, разлука мая. Чакайце новыя песні тры разы на тыдзень - панядзелак, серада і пятніца. Яшчэ больш песен у телеграм канале: https://t.me/spiavaizasynai