☀️ Маці сына парадзіла Серыя “Беларуская народная творчасць” Балады. Том І Нумар 368. Зап. Г.А. Барташэвіч у 1974 годзе ў вёсцы Бычын Бярэзінскага раёна Мінскай вобласці ад С.С. Катарскай #цэнтральнаябеларусь #ўлюбычас #атрута ========== Маці сына парадзіла, На белы свет да й пусціла. Маці сына, ой, ждала год, Ой, ждала год, ой, ждала два. На трэці гадок едзе сынок, Вязе сынок сабе жоначку. Вязе сынок сабе жоначку, А мамачцы - нявестачку. Маці сына сустракала, Зялёна віно налівала. Нявехначку - труцізною, Сын віна не піў, пад каня падліў. Сын віна не піў, пад каня падліў, А труцізначку напалам выпіў. - Не ўмела нас, маці, сустракаці, Умей жа нас, маці, пахаваці. Пахавай жа нас проці цэркаўкі, Проці цэркаўкі, проці ганачку. Проці цэркаўкі, проці ганачку, Проці ганачку ў адну ямачку. Маці сына не слухала, Пахавала сына проці цэркаўкі. Проці цэркаўкі, проці ганачку, Нявехначку - за цэркаўкай. На сыночку вырас зялёны явар, На нявехначцы - бела бяроза. Раслі ж, раслі і схіліліся, Цераз цэркаўку сашчапіліся. Лісток з лістком зляпіліся, Да з таго людзі да дзівіліся. Да з таго ж людзі да дзівіліся, Што на тым свеце палюбіліся. А мамачцы да жаль стала, Узяла тапор - пазрубала. Галлё ў кучкі паскладала, Тое ж галлё папрымалася. Тое ж галлё папрымалася, Маці з усім светам да жагналася.