Магдалены Радзівіл – мецэнатка і асветніца, якая сто гадоў назад бескарысліва і вынікова спрычынілася да адраджэння беларускай культуры і літаратуры: менавіта на яе сродкі друкаваліся першыя беларускія газеты і кнігі, пашыралася выдавецкая дзейнасць. У яе маёнтках працавалі беларускія школы для вясковых дзяцей, яна адкрывала прытулкі для сірот і шпіталі для параненых і хворых падчас Першай сусветнай вайны, ахвяравала вялізныя сродкі на святыні і рэлігійную дзейнасць. Магдалену Радзівіл называюць адной з найбольш маляўнічых асоб навейшай беларускай гісторыі. Справа беларускага адраджэння стала справай жыцця Магдалены Радзівіл. Яна фінансавала перыядычныя выданні і дзейнасць выдавецкіх суполак. З яе дапамогай развівалі сваю дзейнасць выдавецкія таварыствы ў Вільні і суполка “Загляне сонца і ў наша аконца” ў Пецярбургу, выдавалiся газеты “Наша ніва” i каталіцкая беларуская газета “Bielarus”. Пры фінансавай падтрымцы Магдалены быў выдадзены першы беларускі малітоўнік для набажэнстваў “Бог з намі”. Справа духоўнага адраджэння Беларусі была таксама адной з найважнейшых для Магдалены Радзівіл. Яна сама была шчырай верніцай-каталічкай i рупілася аб пабудове грэка-каталіцкай царквы ў Мінску, але не атрымала на тое дазволу гарадскіх уладаў; пасылала грошы на набыццё беларускіх кніг для Духоўнай каталіцкай акадэміі ў Пецярбургу, дзе вучылася цэлая грамада будучых беларускіх святароў. Урэшце, змушаная да выезду за мяжу ў 1918 годзе, яна ахвяравала на пабудову Беларускага калегіума ў Рыме каштоўнае брыльянтавае калье. Магдалена спрыяла адкрыццю дзіцячых прытулкаў і шпіталяў. Яна залажыла ў Мінску дабрачыннае таварыства “Літасць” для дапамогі сем’ям пакліканых у войска. У сваіх уладаннях княгіня адчыніла некалькі беларускіх пачатковых школ для сялянскіх дзяцей. Яшчэ ў даваенны час яна таксама шчодра выдат-коўвала сродкі на стыпендыі для студэнтаў-беларусаў, асабліва для тых, хто ішоў вучыцца ў духоўныя семінарыі. Час няўмольна не жадаў, каб імя гэтай жанчыны ўпрыгожвала пантэон славутых дзеячаў Беларусі, а яе справы выклікалі ў нашчадкаў гонар, пашану і ўдзячнасць, а таксама жаданне браць з яе прыклад служэння Богу, айчыне і бліжняму. Але часы мяняюцца, і ў ХХІ стагоддзі ў сузор’і гэтых імёнаў аднавілася і зорка княгіні Магдалены Радзівіл. Падпісвайцеся на наш канал і цісніце на званочак, каб не прапусціць новыя відэа. Таксама за нашымі абнаўленнямі можна сачыць у сацсетках: http://www.instagram.com/sluchajsiudy http://www.m.tiktok.com/h5/share/usr/6667087573632630789.html http://www.twitter.com/sluchajsiudy http://www.facebook.com/slusiudy http://www.vk.com/sluchajsiudy