Трапіўшы на гаспадарку Міколы Маеўскага, звяртаеш ўвагу на альтанку-майстэрню ў канцы падворка. Апрача жывапісных карцін, бачыш безліч рознай дробязі кавальскай работы, якую мастак збірае, маючы вялікую цікавасць да беларускага фальклору і этнаграфіі. Мікола Маеўскі - майстар нацюрмортаў і жывапісных пейзажаў. Большасць яго прац прысвечаны Белавежскай пушчы -- месцу нараджэння, працы і натхнення. Менавіта ў вёсцы Дварцы, на Камянеччыне, мастак знайшоў свой Ерусалім -- месца, дзе напісаў вялікую колькасць жывапісных палотнаў. Выстаўляўся за мяжой: у ЗША, Швецыі, Германіі, Францыі, Японіі, Турцыі.