У доме насупраць багданаўскага касцёла жывуць дзевяць дзяцей (ад 4да 19 гадоў) і сёстры з Інстытута кансэкраванага жыцця св. Тэрэзы — с. Алена і с. Тэрэза. Ужо 12 гадоў яны даглядаюць дзяцей, якіх знайшлі згаладалымі на вуліцах вёскі ці ўзялі ў раённым прытулку (http://catholic.by/2/home/news/belarus/minsk-mohilev/115699.html). У перыяд Божага Нараджэння вернікі дзвюх мінскіх парафій (Беззаганнага Зачацця Найсвяцейшай Панны Марыі ў Сухараве і Святога Яна, евангеліста, і Максімільяна Кольбэ ў Кунцаўшчыне) па ініцыятыве парталу Catholic.by сабралі сродкі на падарункі для гэтых дзяцей, абутак для іх, хтосьці падараваў камп'ютары, а хтосьці падзяліўся прысмакамі. Выдавецтва «Про Хрыста» прывезла дзецям кнігі, а рэдакцыя нашага парталу дапамагла арганізаваць свята.