Калі патрэба малітвы ў жыцці хрысціяніна не выклікае сумневаў, то прапанова «сесці за парту» можа выглядаць не вельмі прывабнай. Яшчэ адна школа? Зноў нам раскажуць, як трэба і правільна? Ды яшчэ папракнуць за нядбайнасць? Насамрэч, гэта было б зусім нескладана зрабіць, бо дасканаласць межаў не мае, як вядома. Але такой мэты мы не ставім. Калі чалавек моліцца як можа і ўмее, то гэта ўжо вялікая справа, якая прыносіць карысць і яму, і Касцёлу, таму любыя ацэнкі былі б недарэчнымі. Тым не менш, праўда і тое, што ў малітоўным жыцці хрысціяне пакліканыя да ўзрастання. Вось у чым мы і спадзяемся быць вам карыснымі.