Увесь час, дадзены чалавеку, можа быць ахоплены малітвай. “Заўсёды маліцеся і не падайце духам,” – кажа Езус (пар. Лк 18. 1). Але як гэта выглядае ў звычайным жыцці? Мы адчуваем, што малітва – штосьці большае, чым набор асобных дзеянняў і слоў. З яе дапамогай мы пакліканыя будаваць адносіны з Богам, угрунтаваныя на вернасці і любові. Калі на сэрцы радасна і спакойна, нам лёгка ўзнесці малітву падзякі, але і хвіліны цярпення, пусткі, расчаравання могуць стаць глыбокай малітвай. Дзякуючы ёй, мы вучымся глядзець на свет і на сваё жыццё вачамі Стварыцеля і Збаўцы, шукаць перадусім Ягонага Валадарства. Паглядзім шырэй на тое, чым ёсць малітва, і спынімся сёння на самым агульным падзеле формаў малітвы, усведамляючы пэўную ўмоўнасць гэтага падзелу. Не лішне будзе нагадаць, што заўсёды найлепшым спосабам малітвы для канкрэтнага чалавека будзе той, які дапамагае яму ўзрастаць у любові.