Прэзентацыя майсэрні Майстэрня Міхала Анемпадыстава "Дэзань!", якая адбылася 8 верасня 2012 года падчас агульнай прэзентацыі праграмы Лятучага ўніверсітэта на 2012-13 год. Міхал Анемпадыстаў - культурны дзеяч, дызайнер, паэт, аўтар "Narodnaha Albomu" і тэкстаў для рок-выканаўцаў, сябра рады Беларускага саюза дызайнераў, Старабеларускае слова "дэзань" азначае "ўзор" (рус. "образец") вышыўкі, арнамента, малюнка, які выкарыстоўваецца ва ўжытковым мастацтве. У ХVI стагоддзі слова патрапіла да нас з Заходняй Еўропы, а перадусім з Італіі, дзе азначала ўжытковае мастацтва і маляванне. Дадаючы да слова клічнік, мы пераўтвараем яго ў дынамічны дзеяслоў, заклік, замову. Дызайн зрабіўся сёньня адным з найбольш папулярных і запатрабаваных відаў сучаснага мастацтва. Трансдысцыплінарны і сінтэтычны ад пачатку, ён з лёгкасьцю прыўлашчвае веды, тэхналогіі, падыходы з іншых сфэраў дзейнасьці чалавека, а прынцыпы дызайнерскага мыслення, асновы дызайнерскай эстэтыкі, ў сваю чаргу, прасочваюцца ў іншыя віды мастацтва, і нават у прафесійную дзейнасьць, ад мастацтва вельмі далёкую. Такая папулярнасьць, з аднаго боку, падвышае ўзровень побытавай культуры, з іншага - замыльвае базавыя прынцыпы дызайна, паніжае патрабаванні да яго якасьці. Мы паспрабуем навучыцца адчытваць, разумець і ацэньваць тое, што прынята называць дызайнам, а таксама паглядзім праз прызму дызайна на прастору, асяроддзе, свет вакол нас, паспрабуем навучыцца быць дасведчаннымі спажыўцамі "прыгожага", калі яно насамрэч існуе. А калі яно існуе, то што гэта такое? Ці гэта ўніверсальныя паняткі, ці катэгорыі, якія знаходзяцца ў полі актуальнай культурнай традыцыі? Што такое стыль і "пачуццё стылю"? Ці з'яўляецца нацыянальная саматоеснасьць праявай "пачуцця стыля". Ці можа дызайн быць інструментам добраўпарадкавання рэчаіснасці і праектавання будучыні? Разам з тэарэтычнымі ведамі і дыскусіямі, будуць праводзіцца практычныя заняткі, разлічаныя на непрафесіяналаў. Тэмы практычных заняткаў будуць абірацца самімі ўдзельнікамі. У рамках курса мажлівыя непрадугледжаныя планам сумесныя шпацыры і экскурсіі. Больш інфармацыі на сайце Лятучага ўніверсітэта: http://fly-uni.org.