Прэзентацыя Школы Бібліі Ірыны Дубянецкай, якая адбылася 8 верасня 2012 года падчас агульнай прэзентацыі праграмы Лятучага ўніверсітэта на 2012-13 год. Ірына Дубянецкая - бібліст, багаслоў і філосаф, доктар сакральнай тэалогіі (Sacrae Theologiae Doctor) і доктар філасофіі (PhD). Біблія - метатэкст нашае цывілізацыі. У ёй бясцэнныя духоўныя ды інтэлектуальныя скарбы старажытных культур памножыліся на боганатхнёнасьць і творчую геніяльнасьць яе шматлікіх аўтараў. Створаная цягам некалькіх стагоддзяў, яна на тысячагоддзі прадвызначыла лёсы культур, дзяржаў, асоб і ўсёй неймаверна складанай сістэмы іх узаемасувязяў. Яна й цяпер вярэдзіць і натхняе. Незьлічоная колькасьць сэнсавых пластоў біблейскіх тэкстаў адбівае шматмернасьць самога жыцьця і адбіваецца ў шматмернасьці магчымасьцяў іх прачытаньня, расшыфроўкі, інтэрпрэтацыі ды практычнага засваеньня. Школа Бібліі - прастора, дзе мы працуем з біблейскімі тэкстамі і іх кантэкстам (Эгіпет, Месапатамія, Сіра-Палестына ва ўсёй шматграннасьці іх культурных вышукаў і дасягненьняў), дзе вучымся асвойваць і прымяняць экзэгетычныя, герменэўтычныя, лінгвістычныя, культуралагічныя, тэксталагачныя ды іншыя сродкі разуменьня тэксту - ад мэты яго стварэньня да самых тонкіх капіляраў сэнсу. Гэткая праца будзе непазьбежна закранаць самыя розныя аспекты чалавечай веды, уключна з найбольш складанымі пытаньнямі быцьця, бо дасьледуючы Біблію, мы дасьледуем сябе. Заняткі будуюцца такім чынам, каб удзельнікі мелі магчымасьць працаваць з рознымі аспектамі дасьледаваньняў, датычных Гэбрайскай Бібліі (Старога Запавету), Новага Запавету, а таксама іх культуралагічнага кантэксту - Старажытнага Блізкага Ўсходу. Ад удзельнікаў чакаецца актыўная праца, як на занятках так і самастойная. Пажаданым вынікам будзе асабісты ўнёсак удзельнікаў у сучасны беларускі інтэлектуальны дыскурс: напісаньне тэксаў па засвоеных праблемах, а таксама стварэньне вікіпедыйных артыкулаў. Больш інфармацыі на сайце Лятучага ўніверсітэта: http://fly-uni.org. Гл. увесь курс: http://www.youtube.com/playlist?list=PLBAnu4YEjPOIpzKNneA678ErM3T6RUnJA