Прэзентацыя курса Ігара Бабкова "Гісторыя беларускай думкі", якая адбылася 8 верасня 2012 года падчас агульнай прэзентацыі праграмы Лятучага ўніверсітэта на 2012-13 год. Ігар Бабкоў - філосаф і гісторык ідэй, літаратар, кандыдат філасофскіх навук, дацэнт, Гісторыя беларускай думкі - гэта перш за ўсё важныя тэксты, якія засталіся ў беларускай традыцыі, і якія, уласна, і складаюць гэтую самую традыцыю. Гэта гісторыка-культурныя эпохі, кожная са сваёй непаўторнай канфігурацыяй ідэяў, адметным тыпам мыслення, тым, што Мішэль Фуко назваў эпістэмай, альбо інтэлектуальнай фармацыяй. Гэта таксама кантэксты, жывыя людзі, якія спрабавалі мысліць у прапанаваных абставінах, ставіць істотныя пытанні і шукаць свае варыянты адказаў. І, нарэшце, самі ідэі. Усё гэта складаецца ў адметную традыцыю мыслення, транскультурную па сваёй сутнасці, якая ў розныя гістарычныя эпохі была арыентаваная на розныя цывілізацыйныя кантэксты, тэксты якой адпаведна паўставалі на розных мовах і ўваходзілі як складовыя часткі ў больш шырокія транс-культурныя (рэгіянальныя) супольнасці. Задачы курса: - Выявіць сацыяльныя і культурныя перадумовы фармавання беларускай інтэлектуальнай традыцыі, яе ўзаемасувязь з заходнееўрапейскай і сусветнай традыцыяй. - Прааналізаваць асноўныя этапы і змест інтэлектуальнай традыцыі Беларусі ў іх паслядоўнасці, узаемадзеянні і узаемаўплывах. - Прадставіць найбольш істотныя тэксты, у якіх выяўляецца інтэлектуальная традыцыя Беларусі. - Выявіць ступень актуальнасці інтэлектуальнай спадчыны Беларусі ў кантэксце сучаснай культуры Больш інфармацыі на сайце Лятучага ўніверсітэта: http://fly-uni.org.