Прэзентацыя курса Аляксея Ластоўскага "Па-за гісторыяй: сучасныя междысцыплінарныя падыходы ў вывучэнні мінулага", якая адбылася 8 верасня 2012 года падчас агульнай прэзентацыі праграмы Лятучага ўніверсітэта на 2012-13 год. Аляксей Ластоўскі - сацыёлаг, кандыдат сацыялагічных навук, супрацоўнік Інстітута палітычных даследаванняў "Палітычная сфера". Доўгі час, паўтара тысячагоддзі, гісторыкі змагаліся за дасягненне манаполіі на працу з мінулым. Гэта патрабавала як адстойвання аўтаноміі поля і адмежавання ад іншых падазроных форм асэнсавання мінулага (як то пісьменства ці філасофія), так і выпрацоўкі ўласных норм і правіл працы, якія закладвалі падмурак прафесійнай кампетэнцыі гісторыка. XIX стагоддзе стала трыумфальным часам для пазітывісцкай гістарыяграфіі, калі вялікія і манументальныя аповеды мінулага былі ўбудаваныя ў фундамент новапаўсталых нацыянальных дзяржаў, што неймаверна падвысіла значнасць і прэстыж прафесійнай працы з мінулым. Але ў мінулым стагоддзі паспяховы шлюб гістарыяграфіі і дзяржавы пачаў разбурацца. Герменеўтычныя віхуры і постмадэрнісцкія наступы паставілі пад сумнеў усе ранейшыя напрацоўкі і запатрабавалі рэвізіі метадалогіі. Іншыя гуманітарныя і сацыяльныя дысцыпліны пачалі актыўна захопліваць тэрыторыю мінулага, і пераўтвараць у аб'ект свайго даследвання гістарыяграфію праз пашырэнне катэгорый памяці і ідэнтычнасці. Праблематызацыя гісторыі як навукі і гісторыі як мінулага істотная і для айчыннага кантэксту, дзе тэарэтычныя і метадалагічныя інавацыі пакуль знаходзяцца ў статусе партызанскіх дыверсій. Таму галоўнай задачай прапанаванага курса будзе знаёмства з сучаснымі тэарэтычнымі падыходамі да мінулага і прапрацоўка іх у беларускай сітуацыі. Больш інфармацыі на сайце Лятучага ўніверсітэта: http://fly-uni.org.