Тацяна Вадалажская, Уладзімер Мацкевіч, Ірына Дубянецкая, Павал Баркоўскі Універсітэт - не проста ўстанова адукацыі, перш за ўсё гэта ідэя, якая стварае адмысловую прастору, што на працягу стагоддзяў станавілася месцам развіцця еўрапейскай культуры, мыслення і адукацыі. Ствараючы Лятучы ўніверсітэт, мы імкнемся рэалізаваць Ідэю Універсітэта “тут і зараз” – у Беларусі і для Беларусі. І гэтая задача патрабуе ад усіх, хто спрычыняецца да гэтай справы, быць дасведчаным у падставах і актуальных выкліках развіцця ўніверсітэцкай ідэі. Праз гэты курс ствараецца магчымасць асэнсавана ўвайсці ва ўніверсітэцкую прастору, зразумець падставовыя ідэі, праблемы і канцэпты, на якіх будуецца Лятучы ўніверсітэт, разабрацца і самастойна вызначыцца з асабістым шляхам і траекторыяй па “нетрадыцыйнай” для сучасных вузаў і адукацыйных праграм прасторы ўніверсітэта. Курс прызначаны для тых, хто мае памкненне ўвайсці ў прастору Лятучага і гатовы стаць не проста слухачом, а саўдзельнікам універсітэцкіх падзей. У межах курса некалькі чальцоў калегіюма Лятучага ўніверсітэта прадствяць сваю візію і разважанні па базавых пытаннях жыцця ўніверсітэта: • Універсітэт як ідэя і феномен еўрапейскай культуры і мыслення. • Універсітэт як супольнасць • Універсітэт як прастора нараджэння элітаў: гісторыя і сучаснасць • Універсітэцкая адукацыя: сучасныя выклікі і пошук • Лятучы ўніверсітэт: прынцыпы і падставы арганізацыі, каштоўнасці і этас супольнасці