Алег Дзярновіч - гісторык, археолаг, кандыдат гістарычных навук, дацэнт Школа ВКЛ паўстае на вастрыі дыскусій і актуалізацыі праблем спадчыны Вялікага Княства Літоўскага ў нашым рэгіёне Еўропы ў апошнюю чвэрць стагоддзя. У рамках Школы прапануецца не адмаўляцца ад этнічных інтэрпрэтацый гэтай рознаўзроўневай гісторыка-цывілізацыйнай з’явы – ВКЛ, а зразумець падставы гэтых розных інтэрпрэтацый. Такім чынам, ставіцца за мэту не атрыманне гісторыка-ідэалагічнай перамогі, а стварэнне панарамы сэнсаў. Таму ў рамках Школы будзе адбывацца спецыялізаванае абмеркаванне гістарыяграфій і візій гісторыі ВКЛ: літоўскай, украінскай, польскай, расійскай, заходняй (нямецкай, швецкай, англа-саксонскай). У Школе будзе надавацца ўвага тым аспектам гісторыі ВКЛ, якія з крытыкай пазітывізму і сацыяльнага дэтэрмінізму апынуліся ў апошні час найменш распрацаванымі, а менавіта - сацыяльнай гісторыі. Апошнія поспехі ў вывучэнні палітычнай, культурнай, мілітарнай гісторыі ВКЛ парадаксальным чынам прывялі да фрагментызацыі ўяўлення пра гэты феномен, карціна цэльнасці і несупярэчнасці гісторыі рассыпаецца, адбываецца эвалюцыя ў бок спецыялізаваных праблематык. Надыйшоў час аднавіць ужо “сацыяльнае цела” ВКЛ. Яшчэ адзін важны аспект прадметнага вывучэння – новыя метады ў вывучэнні гісторыі ВКЛ: сацыялінгвістычны, просапаграфічны, картаграфічны. Для чытання асобных лекцыі і выкладання будуць прыцягвацца таксама іншыя спецыялісты, у тым ліку з краін-спадкаемцаў ВКЛ.