Валянцін Акудовіч Ралан Барт канцуе сваё знакамітае эсэ “Смерць аўтара” наступнымі словамі: “Каб захаваць пісьму ягоную будучыню, трэба перакуліць міф (пра дамінацыю ў літаратуры аўтара – В.А.): нараджэнне Чытача аплочваецца смерцю Аўтара”. Інакш кажучы, далей ў літаратуры будзе дамінаваць не Аўтар, а Чытач. Тут не да часу дыскутаваць пра слушнасць гэтай тэзы. Барта я згадаў адно дзеля таго, каб заўважыць, што семінар “Літаратурныя чытанні” Лятучага ўніверсітэта, магчыма, і ёсць тым месцам, якое будзе фармаваць беларускага Чытача (у бартаўскім разуменні)… Метадалагічна наш семінар застаецца працягам свайго папярэдніка (як вядома, ад дабра дабра не шукаюць). А вось падбор чытанак гэтым разам будзе фармалізаваны літаратурнай прэміяй Ежы Гедройца (заснавальнік – Міністэрства замежных справаў Польшчы). На сёння гэта самая буйная літаратурная прэмія ў Беларусі. Кнігі першых трох пераможцаў мы з вамі і будзем чытаць. 1.”Зборная РБ па негалоўных відах спорту” (Павал Касцюкевіч). 2.”Аўтамат з газіроўкай з сіропам і без” (Уладзімір Някляеў ). 3.”Хвілінка. Тры гісторыі” (Ігар Бабкоў).