Валянцін Акудовіч Пэўна, бальшыня сярод тых, хто ахоплены дыскурсам “Лятучага ўніверсітэта” пішуць (ці хоцькі-няхоцькі мусяць пісаць) тэксты. Самыя розныя. Артыкулы, эсэ, трактаты, рэцэнзіі, вершы, песні і нават раманы. Сярод іх (асабліва з узгляду на прафесуру) даволі бліскучых стылістаў, майстроў сюжэта і фабулы, адмыслоўцаў кампазіцыі і метафорыкі… Але хапае і тых, хто свой інтэлектуальны талент запакоўвае ў тэкст гэтак жа нядбайна, як раней ў мястэчкавых крамах загортвалі смычныя селядцы ў пашкамутаныя газеты. І сярод навучэнцаў Лятучага, якія яшчэ толькі пачынаюць вымучваць свае першыя тэксты, мяркую, даволі тых, хто хацеў бы атрымаць прафесійную параду, як ім дасканаліць сваё майстэрства пісьма. “Літаратурны варштат” якраз і ствараецца дзеля такой дапамогі. Кожны занятак будзе складвацца з трох частак. Першая: тэарэтычная (знаёмства з законамі, што арганізуюць тэкст у рухомы механізм трансляцыі веды, эўрыстыкі і эмацыйнага ўражання). Другая: калектыўнае абмеркаванне тэкста аднаго са слухачоў (па чарзе). Трэцяя: персанальная праца кіраўніка і слухача над памылкамі і хібамі ягонага тэкста.