Мікалай Лявонаў Матэматыка як інструмент для рашэння задач – практычных альбо навуковых – умоўна кажучы, складаецца з дзвюх частак: гэта пэўныя канструкцыі і логіка іх выкарыстання. Цікава, што і тое, і іншае стаяць, так бы мовіць, на адным падмурку. Вось гэтае адзінства – канструкцыі, логіка і іх агульная аснова, а галоўнае – як гэтым карыстацца, і складаюць змест курса. Як гэта будзе адбывацца? Спачатку будуць выкладацца асновы той ці іншай матэматычнай тэорыі ці метаду. Пры гэтым будуць абраныя тыя раздзелы матэматыкі, якія найбольш ужывальныя, так бы мовіць, у агульначалавечай практыцы, а таксама ў гуманітарных навуках. Выкладанне будзе весціся з шырокім прыцягненнем змястоўных меркаванняў і прыкладаў. У прыватнасці, будзе нададзена ўвага выкрыццю спосабаў маніпулявання з выкарыстаннем матэматыкі і статыстыкі. Затым слухачы з дапамогай выкладчыка будуць практыкавацца ў прымяненні праслуханага матэрыялу. Курс накіраваны на тое, каб слухачы маглі: 1) правільна ўжываць матэматыку ў пэўных параўнальна простых сітуацыях; 2) паразумецца ў сумеснай дзейнасці з партнёрам, які карыстаецца матэматыкай; 3) ацаніць інтэлектуальны прадукт, атрыманы з дапамогай матэматыкі.