Ва Украіне выйшла факсімільнае выданне рукапіснпага Лаўрышаўскага Евангелля - помніка беларускага і ўкраінскага пісьменства пачатку XIV стагоддзя. На ўкраінскай зямлі гэтая кніга не была ніколі да цяперашняга факсімільнага выдання. У той час, як у Беларусі яно захоўвалася больш як 5 стагоддзяў. Напісана прыкладна ў 1329 годзе ў Лаўрышаўскім манастыры, які і сёння існуе ў Навагрудскім раёне. Украінскія мовазнаўцы пры аналізе гэтай пісьмовай крыніцы заўважылі досыць многа украінізмаў (хоць беларускія вучоныя могуць з такой жа доляй верагоднасці казаць аб не меншай колькасці беларусізмаў, і гэта не парадаксальна, бо і ўкраінская, і беларуская мовы працэнтаў на 80, калі не больш, падобныя адна да другой, бо паходзяць ад старажытнай "руськай мовы). Як верагодна і тое, што сярод манахаў-перапісчыкаў былі выхадцы з украінскіх земляў. Дастаткова прыгадаць, што яшчэ з часоў князя-манаха Войшалка ў Лаўрышаўскім манастыры было некалькі манахаў з Палонінскага манастыра, дзе ён жыў тры гады. А манастыр гэты знаходзіўся ў межах Галіцка-Валынскага княства...