15 траўня 2019 года адбыўся першы выступ у межах "адкрытай кафедры" Лятучага ўніверсітэта. Тэму "Тэхналогіі ў медыцыне: выклік каштоўнасцям, стасункам і этыцы" прадставілі навукоўцы-лекары Андрэй Вітушка і Мікалай Галабародзька. Часам падаецца, што развіццё тэхналогій у медыцыне мала тычыцца шэраговага беларуса. Але змены адбываюцца не толькі на тэхнічным узроўні, яны закранаюць сутнасныя ўяўленні пра чалавека і сацыяльныя стасункі вакол здароўя. "Ад патэрналізму праз супрацоўніцтва да медычнага дыгіталізму" — так можна апісаць шлях зменаў у стасунках "лекар—пацыент" пад уздзеяннем прасоўвання пэўных каштоўнасцяў і развіцця тэхналогій. • Ці стварае гэты рух новыя пытанні і выклікі? • Як будуць будавацца гэтыя стасункі і ці ёсць тут падставы для новых сацыяльных размежаванняў і няроўнасці? • Як працуе з гэтымі і іншымі пытаннямі медыцынская этыка і біяэтыка? • Ці тычацца нашага грамадства тыя выклікі, што сёння вызначаюцца ў сувязі з тэхналогіямі ў медыцыне? • Ці закранае нас праблематызацыя базавых паняццяў, у межах якіх традыцыйна апісваюць біяэтыку (аўтаномія асобы, карыснасць і справядлівасць)? Разам з лекарамі і спецыялістамі ў біяэтыцы Андрэем Вітушкам і Мікалаем Галабародзькам мы паспрабуем разабрацца з гэтымі пытаннямі і вызначыць іх актуальнасць для дзейнасці розных суб’ектаў у Беларусі. Прэзентацыі да выступу: • Андрэя Вітушкі: https://drive.google.com/open?id=1E5bJiBcY8YGb6iLxzSjZ3FNgosRzXPdV • Мікалая Галабародзькі: https://drive.google.com/open?id=1U_az5Ss7HjpOdLmApGIHc1sB6LipQAHE Пра лектараў: • Андрэй Вітушка — дзіцячы рэаніматолаг, кандыдат медычных і магістар гуманітарных навук. Сфера цікаўнасцяў: узаемадачыненні "лекар—пацыент—сістэма аховы здароўя". • Мікалай Галабародзька — дзіцячы інфекцыяніст, кандыдат медыцынскіх навук. Вывучаў магчымасці падвышэння патэнцыялу сістэмы этычнай экспертызы біямедычных даследаванняў у Беларусі. Больша падрабязнасцей — на сайце Лятучага ўніверсітэта: http://fly-uni.org/novosti/tehnalogii-u-medycyne/