(русские субтитры доступны) Беларускія СМІ гэтымі выходнымі выйшлі з інфармацыяй пра магчымы айчыны сьлед у ракетнай праграме КНДР. Гаворка йдзе пра шасі да балістычнае ракеты Hwasong-15 - той самай, якая паводле сваіх характарыстык можа спакойна накрыць тэрыторыю ЗША. Ракета была прэзэнтаваная напрыканцы 2017, а ўжо у 2018 яе прадэманстравалі на колавай пускавой устаноўцы. Менавіта шасі прыцягнула ўвагу беларускіх журналістаў - надта яно канструктыўна падобнае на вырабы МЗКТ 79-й сэрыі - той самай, якая выкарыстоўваецца, апроч іншага, як шасі да расейскіх "Тополь-М". КНДР, натуральна, заяўляе пра самастойную распрацоўку ды запуск ў вытворчасьць як ракеты, так і шасі. Але, зважаючы на тое, што нават у РФ спробы стварыць сваю "Платформу О" скончыліся фіяска на дэманстрацыйным палігоне, у версію Паўночнае Карэі верыцца слаба. У той жа час шасі для ракетнае тэхнікі робяць у Кітаі. Больш таго, там ёсьць СП беларускага МЗКТ і China Sanjiang Space Industry Group Co, якое працуе яшчэ з 1998 году. Свайго часу гэтае прадпрыемства актыўна выкарыстоўвалася беларускай прапагандай як сьведчаньне тэхналягічнае моцы нашае дзяржавы. Але, з сярэдзіны 00-х на яго "забыліся" і зараз не узгадваюць. Тым часам завод працуе. Дык ці ёсьць насамрэч беларускі сьлед у карэйскай ракетнай праграме. І, самае галоўнае пытаньне - колькі Беларусь зарабляе на сумесным прадпрыемстве ў КНР? Пытаньне важнае, бо афіцыйная статыстыка пра гэтае маўчыць. Жадаеце ведаць болей - запрашаю на маю старонку ў ФБ: https://www.facebook.com/Ihar.Tyshkevich