У Беларусі затрымалі відэа-блорегаў, сярод якіх ёсьць і аўтар каналу "Страна для жизни" Ціханоўскі. Мае гледачы ў камэнтах запытваліся пра маё бачаньне сытуацыі. Што ж. Высновы пакуль рабіць зарана, але ёсьць некалькі цікавых дэталяў. Прайдуся па іх тэзісна. Каго затрымалі і што было крыху раней 1. Затрымалі не аднаго Ціханоўскага, але акцэнт робіцца менавіта на ягонай пэрсоне. 2. Відавочная наяўнасьць групы каналаў зь некалькіх колаў і каардынацыя інфармацыйных пасылаў. Ціханоўскі - толькі фронтмэн большае сыстэмы; 3. Гэтая група каналаў збольшага ўзьнікла за апошнія 14-16 месяцаў. Праца па разьвіцьці сеткі была ВЕЛЬМІ прафэсыйнаю. 4. Інфармацыйная кампанія(кантэнт каналаў) добра прадуманая. Сэгмэнт "пэрсанальных гісторый" - асабістых праблем грамадзян з экстрапаляцыяй на агульную сытуацыю удалы. Асабістыя гісторыі + эмоцыі заўсёды заходзяць. Пры гэтым ёсьць крытыка, але няма ўласнае пазыцыі: проста супраць усяго кепскага за усё добрае. Рацыянальны падыход, бо дазваляе пазьбегнуць драбленьня аўдыторыі на пачатку раскруткі. (негатыўныя гісторыі глядзяць усе, а вот што да ідэяў "зрабіць" - спрачаюцца). 5. Кампанія мела некалькі тэзісных пікаў у апошні год: лістапад 2019 году, лютаы 2020. І, нарэшце, трэці - цяпер. 6. Фармулёўкі, ход кампаніі, паралельная актыўнасьць наводзіць на плянаваны этап эскалацыі. 7. Разьвіцьцё каналаў на такім узроўні - дастаткова дарагое задавальненьне. Канал такой інтэнсіўнасьці - мінімум 4 працаўніка на поўную стаўку. Пэрыферыйныя каналы сыстэмы - яшчэ 5-6 асобаў (якія могуць уключаць у сябе саміх аўтараў). Такім чынам маем добра арганізаваную, кваліфікаваную каманду, якая здолела разгарнуць досыць моцную па беларускіх мерках медыйную кампанію праз альтэрнатыўныя крыніца данясеньня інфармацыі. Тое што пералічу далей, можа быць проста супадзеньнем, але зьбег па часу цікавы 1. На мінулым тыдні у Менску правялі обшук у расейскага паліттэхноляга Уладыслава Рогімава, які вёў ТГ канал "Дилетант". Цікава, што гэтая персона выдае сябе за былога тэхноляга Зяленскага. Хаця, падчас выбараў у Украіне ён бываў і ростам уплыву нетрадыцыйных медыя, натуральна, цікавіўся. 2. Праз 5 дзён у адзін дзень МЗС Беларусі пазбаўляе акрэдытацыі журналістаў расейскага першага каналу, праходзяць затрыманьні блогераў (у тым ліку узгаданага Ціханоўскага), БТ каціцца катком па расейскім тэлебачаньні. Гэта, паўтару, можа быць проста супрацьдзеяньнем. Час пакажа. Далей Ціханоўскі заяўляе, што ён ідзе ў прэзыдэнты. Гэта азначае, што ягоная група ці то разлічвае прыцягнуць ці то мае рэсурс на разгортваньне палітычнае сеткі па краіне. Калі гэта рабіць хутка - гэта ВЕЛЬМІ дорага. Ці мае ён намер скласьці канкурэнцыю Лукашэнку ў кампаніі 2020. Наўрад ці. А вось рэзвы старт кампаніі на будучыя парлямэнцкія і мясцовыя выбары - рацыянальна. Гаворка йдзе, паўтару, не пра адну асобу, а пра стварэньне палітычнага руху. Цяпер пра высновы. Лягічных варыянтаў, што тлумачаць працэсы, ёсьць тры: 1. Гэта гульня братоў з-за парэбрыка па уваходу на палітычнае поле Беларусі. Такая вэрсія можа быць падтрыманая ходам кампаніі ў Ютуб (пікі іфармацыйнага накату супадалі з перамовамі па інтэграцыі, нафтавай вайной і зараз са спрэчкамі вакол 9 траўня (дату Лука выкарыстоўвае ў сваіх мэтах - там пра "памяць" мінімум, пра палітыку багата). А, таксама, мінулае самога Ціханоўскага ды супадзеньні па часе са спробамі беларускіх уладаў падняць стаўкі ў інфармацыйнай пікіроўцы з Масквою. 2. Гэта гульня самой беларускай ўлады. Стварэньне проксі-апазыцыйнага руху, які ўтылізуе магчымыя пратэстныя настроі. На карысьць такой вэрсіі можна ўзгадаць адсутнасьць хуткай рэакцыі на рэзкую рыторыку (штрафы выпісвалі і за менш абразьлівыя эпітэты Лукашэнку у сацсетках), падвод пад эскалацыю так, каб гэта было публічна і мясцовыя міліцыянты выглядалі, прынамсі, тупа. А таксама пэўная "аўтаномнасьць" групы Ціханоўскага, якая не йдзе на актыўны кантакт з большасьцю існых апазыцыйных групаў у Беларусі (у тым ліку новых) 3. Гэта проста група вельмі таленавітых людзей, аўтараў, бізнэсоўцаў, аналітыкаў, якія здолелі знайсьці, акумуляваць і рацыянальна выкарыстаць рэсурс для стварэньня моцнай медыйнай пляцоўкі (дакладней сеткі пляцовак, якія цяжка ліквідаваць з прычыны адсутнасьці бачнае структуры) для сваіх мэтаў. У пераліку такіх могуць быць палітычныя, бізнэсовыя ды іншыя мэты. Які з трох варыянтаў найбольш верагодны я пакуль сказаць не магу. Але да канца траўня ўсё стане зразумела, калі сачыць за зьнешняй медыйнай падтрымкай групе Ціханоўскага (хто будзе яе мэтанакіравана круціць, а не проста асьвятляць падзеі) а таксама пра праявах наяўнасьці рэсурсу для разгортваньня палітычнага руху. У першую чаргу гаворка нават не пра грошы, а пра каардынатараў у гарадох - ключавых асобах новых асяродкаў. ======= Падтрымай канал падпіскаю на патрэоне https://www.patreon.com/join/ihar_Tyshkevich Гэта стымулюе разьвіваць пляцоўку, браць новыя тэмы.