Сёння незалежныя беларускія медыі аб'ядноўваюцца ў 12-гадзінным усебеларускім анлайн-марафоне салідарнасці "Нам не ўсё роўна!", каб сабраць грошы для палітычных зняволеных і іх сем'яў. У эфіры прымуць удзел блогеры, палітыкі, дзеячы культуры і спорту, грамадскія актывісты. Трансляцыя будзе весціся адначасова на мностве незалежных YouTube-каналаў з 10 раніцы да 10 вечара па мінскім часе. Ініцыятыву падтрымала прадстаўнік сацыяльнай палітыкі Аб'яднанага пераходнага кабінета Беларусі Вольга Гарбунова са сваёй камандай. У арганізацыі і правядзенні марафону ўдзельнічае больш за 20 незалежных медыяў. Усе ахвяраванні будуць збірацца на адзін рахунак, адкуль сабраныя грошы будуць размеркаваны паміж фондамі, ініцыятывамі і арганізацыямі, якія дапамагаюць палітычным зняволеным і іх родным. Кантраляваць размеркаванне сабраных грошай будзе спецыяльна створаная наглядальная рада, у якую ўвойдуць прадстаўнікі медыя-арганізатараў.