У міжваенны перыяд Беларуская хрысціянская дэмакратыя стала адной з найбольш папулярных і масавых арганізацый у культурным і палітычным жыцці насельніцтва Заходняй Беларусі, нягледзячы на неспрыяльныя ўмовы з боку рэлігійных і свецкіх уладаў. Істотнай заслугай беларускіх хрысціян дэмакратаў была практыка аб’яднання праваслаўных і католікаў пад адной ідэалогіяй, ідэалогіяй палітычнай, духоўнай, эканамічнай незалежнасці і самабытнасці беларускага народу. Сябры БХД – БНА (Беларускае народнае аб’яднанне) прымалі актыўны ўдзел у культурным, грамадскім і палітычным жыцці Зах. Беларусі. Імі былі створаны дзесяткі розных інстытуцый, арганізацый, суполак, сотні гурткоў БХД і Беларускага інстытута гаспадаркі і культуры (БІГіК), свае выдавецты і перыядычны друк. Багатай была і творчая спадчына беларускіх хадэкаў – сотні кніг мастацкай, духоўнай, публіцыстычнай, гістарычнай і гаспадарчай літаратуры.