*** Падтрымаць кантэнт на роднай мове тут: https://www.patreon.com/aliakhnovich ___ Пра відэа 11 студзеня 2013 года ён быў знойдзены павешаным у сваёй кватэры ў Брукліне. Сузаснавальнік папулярнага форуму Reddit, адзін з распрацоўшчыкаў RSS і ліцэнзій Creative Commons скончыў жыццё самагубствам ва ўзросце 26 гадоў. Як мяркуецца, на фоне пераследу з боку амерыканскай судовай сістэмы. Яму пагражалі 50 гадоў турэмнага зняволення і штраф у 1 млн долараў за спампоўку амаль 5 млн публікацый з інтэрнэт-бібліятэкі навуковых часопісаў. Прытым хлопец анічога не ўзламаў, але ўсё адно рызыкаваў пражыць у турме да сівых гадоў. З усіх інтэрнэт герояў «нулявых» яго постаць мне імпануе больш за ўсё. Яна не запэцкалася як тая ж фігура Марка Цукерберга ў апошнія гады, які пабудаваў інтэрнэт-імперыю, збіраючы і манетызуючы прыватную інфармацыю. Зразумела, хлопец загінуў у маладым веку, але не хачу нават сумнявацца ў тым, што ён і дагэтуль жыў бы годным чалавекам. Вундэркінд, піянер Інтэрнэту і актывіст, што змагаўся за ўсеагульны доступ да інфармацыі. Гэта гісторыя майго героя — Аарона Шварца. Мальца, якім кіравала няўрымслівая цікаўнасць і вера ў тое, што інфармацыя з'яўляецца самай каштоўнай валютай, формай багацця, якога ніхто не павінен пазбаўляць.