Гэту песню вельмі доўга лічылі народнай, але гэта не так. У далёкім 1936 годзе беларускі паэт Адам Русак напісаў першыя радкі песні ў лісце да маці. А пазней нарадзіўся вядомы сёння верш. Музыку напісаў кампазітар Ісаак Любан, які разам з Русаком вучыўся ў Мінскім музычным тэхнікуме. На першай Дэкадзе беларускага мастацтва ў Маскве ў 1940 годзе песня “Бывайце здаровы” была аздобай заключнага канцэрта, які з поспехам прайшоў у Вялікім тэатры Савецкага Саюза. Доўгі час аўтарам тэкста лічылі савецкага паэта Міхаіла Ісакоўскага, але ён толькі пераклаў яго на рускую мову. Але менавіта беларускамоўны варыянт песні у выкананні народнай артысткі СССР Ларысы Александроўскай набыў неверагодную папулярнасць у народзе.