Да Міжнароднага дня роднай мовы Дзяржаўны літаратурны музей Янкі Купалы і Нацыянальная бібліятэка Беларусі запрашаюць на “Купалаўскі дыктант”. Гісторыя мовы непарыўна звязана з гісторыяй народа, які гаворыць на ёй. І калі ў вачах адлюстроўваецца душа, то ў мове адлюстроўваецца грамадства. Кожны ахвотны зможа далучыцца да дыктанта, адчуць смак роднай мовы і магутнасць Купалавага слова, паспрабаваць свае сілы ў валоданні нормамі беларускага правапісу, напісаўшы тэкст аднаго з артыкулаў Янкі Купалы. На ролю выкладчыка запрошаны акцёр Рэспубліканскага тэатра беларускай драматургіі, заслужаны артыст Рэспублікі Беларусь Валянцін Салаўёў. Для ўдзелу ў “Купалаўскім дыктанце” на пляцоўцы Нацыянальнай бібліятэкі будуць запрошаны першыя 140 чалавек, якія прайшлі рэгістрацыю, а прамая трансляцыя на YouTube з'яўляецца выдатнай магчымасцю далучыцца да дыктанта ўсім ахвотным з Беларусі і з-за мяжы. Мерапрыемства адбываецца ў рамках святкавання 140-гадовага юбілею першага народнага паэта Беларусі Янкі Купалы і 100-годдзя Нацыянальнай бібліятэкі Беларусі.