Падвядзенне вынікаў XVІІ Міжнародных кнігазнаўчых чытанняў 23 красавіка 2021 г. (Нацыянальная бібліятэка Беларусі) XVІІ Міжнародныя кнігазнаўчыя чытанні прайшлі 22–23 красавіка 2021 г. у Нацыянальнай бібліятэцы Беларусі. За дзесяцігоддзі правядзення навуковы форум стаў сапраўдным брэндам, пазнавальным сярод даследчыкаў і спецыялістаў розных краін. Штогод у праграме чытанняў – сустрэчы даследчыкаў, навуковыя дыскусіі і абмеркаванні, выставы і прэзентацыі. Міжнародныя кнігазнаўчыя чытанні з’яўляюцца адной з галоўных пляцовак краіны для абмеркавання вынікаў навуковых даследаванняў па пытаннях кніжнай культуры і кніжнай спадчыны. Канферэнцыя дасягнула сапраўды высокага ўзроўню, набыла вялікую папулярнасць і збірае даследчыкаў кнігі з розных краін свету. Усіх яе ўдзельнікаў аб’ядноўвае нязменная цікавасць да кніжнай культуры Беларусі, яе гісторыі, дасягненняў і перспектыў. У праграме – больш 80 дакладаў ад навукоўцаў з 7 краін. Канферэнцыя адбылася ў жывым фармаце, а таксама прадугледжвала анлайн-трансляцыю і дыстанцыйнае далучэнне аддаленых удзельнікаў.