Незвычайная выстава «З кніг Уладзіміра Караткевіча», прымеркаваная да 90-годдзя з дня нараджэння пісьменніка, адкрылася ў Музеі кнігі Нацыянальнай бібліятэкі Беларусі. Упершыню на выставе можна ўбачыць багаццую падборку кніг з кабінета пісьменніка, даведацца, якія рукапісы, старадрукаваныя і рэдкія выданні захоўваліся ў кнігазборы. Асноўнае месца ў экспазіцыі нададзена экслібрысам Уладзіміра Караткевіча. Пераважная іх частка зроблена самім пісьменнікам: разнастайныя кніжныя знакі, якія адмыслова выкананыя і падабраныя для пэўных выданняў. На выявах – знакавыя постаці беларускай культуры: Скарына, Гусоўскі, а таксама ўлюбёныя Караткевічам ветразі. Вылучаецца экслібрыс з абрысамі зброі касінераў. Яго пячатку і клішэ можна ўбачыць на выставе. Несумненную цікавасць абуджаюць экслібрысы, створаныя для пісьменніка мастакамі. Працы Арлена Кашкурэвіча, Міколы Купавы, Уладзіміра Басалыгі, Іосіфа Капеляна, Генадзя Грака і Вячкі Целеша можна будзе ўбачыць на старонках выданняў і даведацца гісторыю іх стварэння. Унікальныя дароўныя надпісы на кнігах уводзяць у сяброўскае і творчае кола пісьменніка. У экспазіцыі – аўтографы родных Уладзіміра Караткевіча, таварышаў і настаўнікаў маладосці, літаратурных прататыпаў, вядомых творцаў, сяброў і паплечнікаў: Адама Мальдзіса, Васіля Быкава, Рыгора Барадуліна, Янкі Брыля і іншых, а таксама нечаканы па-караткевічаўску жартаўлівы аўтограф самому сабе. Выстава падрыхтавана сумесна з захавальнікамі спадчыны Уладзіміра Караткевіча – сям’ёй пляменніцы пісьменніка Алены Сінкевіч. У экспазіцыі таксама прадстаўлены кнігі з фондаў Дзяржаўнага музея гісторыі беларускай літаратуры. Відэапрэзентацыя дэманструе аўтарскі аповед самой Алены Сінкевіч пра бібліятэку пісьменніка, а таксама развагі ініцыятара і стваральніцы выставы - загадчыцы сектара музейнай дзейнасці Нацыянальнай бібліятэкі Беларусі Таццяны Захаравай.