Творы Янкі Купалы і вітанні з нагоды яго дня нараджэння прагучалі на розных мовах і ў розных краінах свету: Балгарыі, Грузіі, Ізраілі, Латвіі, Расіі, Славакіі. Імя народнага паэта Беларусі шырока вядома за межамі Беларусі. Помнікі і памятныя дошкі паэту ўсталяваны не толькі ў Беларусі, але і ў Балгарыі, Грузіі, ЗША, Кітаі, Латвіі, Літве, Польшчы, Расіі, Славакіі, Фінляндыі і іншых краінах. Янка Купала (1882—1942) — беларускі паэт, драматург, публіцыст, перакладчык, класік беларускай літаратуры, адзін з заснавальнікаў новай беларускай літаратуры і літаратурнай мовы. Народны паэт Беларусі (1925). Творчасць Купалы адзначаецца за яркае апісанне сялянскага быту, нацыянальнага характару беларусаў і яго светаразумення. Імя Янкі Купалы носяць шматлікія вуліцы ў Беларусі і за мяжой, праспект, плошча і населены пункт. Імя Янкі Купалы маюць Нацыянальны акадэмічны тэатр у Мінску, Інстытут літаратуразнаўства Нацыянальнай акадэміі навук Беларусі, Гродзенскі дзяржаўны ўніверсітэт, шэраг бібліятэк і школ, парк у Мінску і станцыя сталічнага метрапалітэна. У гонар паэта ў 1957 годзе была заснавана Літаратурная прэмія імя Янкі Купалы. З 1995 года сістэматычна праводзяцца штогадовыя Купалаўскія чытанні. У 1996 годзе быў створаны Міжнародны фонд Янкі Купалы.