Жывая трансляцыя прэзентацыі навуковай манаграфіі Алеся Сушы «Асэнсаванне шэдэўра. Берасцейская Біблія». Берасцейская Біблія – гэта найпрыгажэйшае, найдаражэйшае і самае вялікае выданне Беларусі XVI–XVIII стст. Яна стала сапраўднай легендай, якую навукоўцы заслужана называюць шэдэўрам кніжнай культуры эпохі Адраджэння. Гэта кніга на вякі праславіла месца свайго ўзнікнення і ўсіх далучаных да яе стварэння. Выданне пабачыла свет у Берасці 4 верасня 1563 г. і адразу ж звярнула на сябе ўвагу чытачоў, даследчыкаў, багасловаў, перакладчыкаў не толькі ў Беларусі, Літве і Польшчы, але і далёка за межамі нашага рэгіёну. Сёння яно ў поўнай меры можа лічыцца адным з культурных сімвалаў і нават брэндаў Берасця і ўсёй Беларусі. Манаграфія ўключае вынікі комплекснага навуковага даследавання Берасцейскай Бібліі 1563 г. – сапраўднага шэдэўра айчыннай і сусветнай культуры. Аўтарам зроблена спроба не толькі апісаць абставіны стварэння і бытавання гэтага кніжнага помніка, але і асэнсаваць яго значнасць як твора кніжнага мастацтва, моўнай культуры, біблеістыкі, літаратурнай і навуковай працы нашых продкаў, паказаць непаўторныя рысы гэтага найпрыгажэйшага, найдаражэйшага і самага вялікага выдання Беларусі XVI–XVIII стст. Дадзеная кніга – гэта спроба разгадаць таямніцы “самага загадкавага выдання часоў Вялікага Княства Літоўскага” і даць падказку сучаснікам, як неабходна аберагаць і захоўваць сваю нацыянальную спадчыну. Алесь Суша – кнігазнавец, кандыдат культуралогіі; намеснік генеральнага дырэктара Нацыянальнай бібліятэкі Беларусі; старшыня Міжнароднай асацыяцыі беларусістаў; даследчык і папулярызатар кніжнай спадчыны Беларусі. Ініцыятар і выканаўца многіх праектаў па факсімільным узнаўленні кніжных помнікаў, у т. л. Брэсцкай Бібліі. Прэзентацыя адбудзецца 25 лістапада 2020 г. Брэсцкай абласной бібліятэцы імя М. Горкага і прымеркавана да святкавання 80-годдзя бібліятэкі. Нагадаем, што тут, у аддзеле рэдкай кнігі, захоўваецца фрагмент старажытнага фаліянта, перад будынкам бібліятэкі ўсталяваны помнік Берасцейскай Бібліі, лагатып Абласной бібліятэкі грунтуецца на выяве Берасцейскай Бібліі, а таксама на працягу многіх гадоў праходзяць знакамітыя міжнародныя чытанні “Берасцейскія кнігазборы”.